Можгаплем
Наши Контакты: 8 (341-39) 3-64-33
427793, Удмуртская Республика, город Можга, улица Фалалеева, 41.

Акции и Новинки

Новости

« Назад

Ӟеч ошлэн дуныз - 1 миллион манет  06.05.2019 15:16

842d54e32f

Трос йӧл басьтон генетика бордысь но потэ. Та бордын синмаськымон ужа «Можгаплем» предприятие - Канадаысь, Голландиысь, США-ысь ошъёссылы луыса, шаерысьтымы пудо уллё юнма. Предприятиысь специалистъёс хозяйствоосысь скалъёсты но эмъяны юртто, ёросъёсын дышетонъёс но радъяло.

Визь-кенешен юртто

Можга ёросысь «Можгаплем» предприятие 22 ёросысь 125 хозяйствоез син шораз возе, татысь пудо уллёез йылтыны но юнматыны юрттэ. Специалистъёс котькуд скаллэсь конституцизэ лыдэ басьтыса, солы тупась ош быръё, кунян каньылэн мед вордӥськоз, ассэ но, скалзэ но вӧсь медаз кары шуыса. Та бордын угось пудолэн тазалыкез, нош хозяйстволэн - барышез. Кыӵе ке хозяйствоын сюрооссы висьыны кутскыку но, «Можгаплемысь» специалистъёс эмъяны юртто, визь-кенеш сёто. Башкириысь Татышлы ёросысь хозяйствоос но «Можгаплеме» вазисько. Солы оско шаерысьтымы 29 племхозяйствоос, 9 племзаводъёс но 20 племрепродукторъёс. Ӟеч выжыысь кидыс уськытэмен, котькуд скалзылэсь шорлыдын 7 сюрс килограммлэсь трос йӧл кыско. Можгаосын валче ужась мукет предприятиосын но лыдпусъёссы нуналмысь йыло. Соин но «Можгаплемлы» вазиськисьёс толэзьлы быдэ тросгес луо.

Кылем арня вискын Дэри ёросысь Азин нимо хозяйствое люкаськылӥзы районысь зоотехникъёс но осеменаторъёс. Соос асьсэос «Можгаплеме» вазиськизы, дышетонъя курсъёс ортчыны курыса.

- Асьме тодэммыя гинэ ужаммы уг луы ни - выль технологиос котыре кыстӥськоно, - шуо гуртоос. - Скал муры кылиз ке, йӧл усёз. Нош «Можгаплем» предприятиысь специалистъёс кыл вылын гинэ уг валэкто - котькуд пудоез асьсэос котыр эскеро на.

Дэри ёросысь гурт удысъя управлениысь валтӥсь зоотехник Надежда Котельникова верамъя, миым ёросазы хозяйствоосын 100 скаллэсь 83 процентсэ кунян басьтӥзы. Та лыдпусэз эшшо но умоятэмзы потэ. Соин ик вань хозяйствоосысь специалистъёс дышетскыны лыктӥзы. Валче ужамлэн пайдаез соку ик шӧдӥське, шуэ кивалтӥсь. Зэм, туннэ ёросын мукет ласянь шуг-секытъёс кылдэмын: урожай трос люкан сьӧры уйиськыса, ӟечлык сярысь вунэто. Соин ик пудо сиёнлэн ӟечлыкез начар. Надежда Котельникова верамъя, таин валче пудооссылэн пыдъёссы быро, кунянъёс куло. Югдурзэс умоятон вылысь «Можгаплем» предприятие нош визь-кенешен юрттэ.

- Шаерысьтымы тросэз скалъёс эндометритэн курадӟо, - вера «Можгаплем» предприятиысь специалист Ирина Волкоморова. - Кунян ваемзы бере соосты умой эмъясь уг сюры, висёнзы пыдло пыӵа. Эшшо ке кунян ваён каразы пыктосъёс кылдыло. Та черъёсын сэрен скаллы кунян уг сюры аръёсын. Хозяйствоосы потыса, пудоез эскериськомы. Туала куронъёслы тупась УЗИ-аппарат басьтӥмы. Дуно луэмысьтыз, хозяйствоос сое басьтыны уг дырто. Соин ужаны быгатыны но кулэ ай - ёросъёсын валась, висёнэз дыраз тодмась специалистъёссы уг тырмо.

Узи висёнъёсты гинэ уг шарая. Кунян сюремын я ӧвӧл шуыса, со бызьылытэм бере 35 нуналаз ик возьматэ ни. Аппараттэк угось 90 нуналскын гинэ адӟиське. Любовь Мордвинцева верамъя, 3 толэзь возьман хозяйство понна бадӟым ыштонъёс вае. Кылсярысь, 21 нуналлы ӝегатскон - со 10 сюрс манет ыштон. Нош скал уллёлэн лыдыз 1 сюрс ке, со 10 миллион манет люкаське. Соин ик скалъёсты УЗИ-ен учконо, кунян сюрымтэ ке, скалэз нош бызьылытоно.

- Милям ужмы: осеменаторъёсты скаллы огкутскемен кидыс уськытыны дышетыны, - шуэ Любовь Георгиевна. - Ки но дышыны кулэ, быгатонлыкъёсты но волятоно. Али шорлыдын скалъёслы 2 пол подсадка лэсьтоно луо. Пудоен ужаны

дышетэммы шоры кидысэн вуз карись куд-ог пичиесь предприятиос кырыж учко: хозяйствоосты нодъяды ке, тӥ доры вазиськисез ӧжытгес кылёз, бизнесс быроз, шуо. Но ми лыдъяськомы: хозяйствоосын оскымон но огкылысь ужано, соку соос эшшо но ӵемгес дорамы вазиськозы.

Куд-огез воксё но скаллэсь бызьылон потон мылкыдъёссэ уг шӧды я валатэк кыле. Талы но «Можгаплем» предприятиысь специалистъёс дышето. Соин но, лэся, доразы ӵемысь лыкто. Али тани Дэбес ёросысь огез хозяйство вазиськиз: Москваысь но, кытысь но специалистъёс кулэ ӧвӧл - тӥ лыктэ, тӥ умой ужаськоды, шуиз.

Куд-огез хозяйствоос ош возё на. Но та скалэз курадӟытон. Эшшо ке генетика ласянь бадӟым ыштон. Куд-огез угось ветылъёссэс атаенызы бызьылыто. Кыӵе азинскон сярысь вераськон луоз со?

Эмбрионъёсын выро

«Можгаплем» предприятилэн кивалтӥсезлэн воштӥсез Константин Шкарупа верамъя, предприятие ялан выльдӥське. Эмбрионъёсты пуктонэн выре ни. 1-ез эмбрион ог 25 сюрс манет сылэ. Но хозяйствоос дун шоры уг учко - скалзы кунян вайиз ке, со угось трос пол барышен берытскоз. Эсьма, муры уз кыльы. Тани алигес Грак ёросысь «Родина» хозяйствоен эмбрионъёсъя огкыл юнматӥзы. Пумен сяме пыӵа ни сексированной кидысэн ужан но. «Можгаплем» предприятиысь специалистъёс ветыл я ош луоно кидысъёсты нимаз быръё. Хозяйствоос соку ик тодо ни, кӧня йырлы матысь дыре скал уллёзы йылоз.

«Можгаплемен» кивалтӥсь Александр Ральников пусъемъя, предприятие дась басьтӥськыны ӟеч выжыысь кечтака уськытон борды. Туннэ шаерысьтымы Каракулино но Вотка ёросъёсысь фермеръёс гинэ кеч вордо. Но та уды азинскыны кулэ. Соин ик такаос но кулэ луозы. Зэм, со понна можгаос али инты утчало. Ошъёсын артэ кечъёсты интыяны уг яра угось - висёнъёссы огкадесь луыны быгатозы. Нош ошъёс предприятиын дуноесь. Кылсярысь, 1 миллион манетэн басьтэмез но вань. Зэм, Александр Ральников сое дуно уг лыдъя, 10, 40 миллион манетэн ошъёс но вань, шуэ со. Туннэ татын 28 ош. Уллёез йылтыны но луоно. Но туннэ предприятие Америкаысь но тужгес усто выжыысь кидыс вуттыны быгатэ. Гуртоос но шуо: генетика бордын ужаку, патриотизм шоры уг учко ни. Туннэ котькуд хозяйство курыны быгатэ со выжыысь скал, кыӵеез солы кулэ. Трос, нап но умой белокен йӧл басьтон сьӧры гинэ табере уг уйисько ни. Вералэсь формазэ но, скаллэсь пыдъёссэ но, висёнъёслы сётскемзэ но - ваньзэ асьсэос бырйыны быгато - «Можгаплем» вуттэ. Асьсэлэн но ошъёссы Россиын одӥгъёсыз устоосыз пӧлы пыро. Предприятие ачиз но селекциен выре. Можгаын али трос йӧл сётӥсь голштинской но сьӧд-куӵо выжыысь ошъёс вордо, озьы ик сӥльлы ярасьёссэ возё - абердин-ангус но герефорд выжыысь.

Тужгес бадӟымез ош 1 тонналэсь секыт кыске. Палэнысен шимес чебересь адӟисько. Матысен доразы лыктыны ик уд дӥсьты.

- Ош сюдон, миськон, утялтон - уж секыт ӧвӧл кадь, но жадёно, - шуо ош утялтӥсьёс Антон Иванов но Виталий Беляев. - Тужгес жаде тыбыр. Ошез гидысь поттэмлы, сое берен пыртэмлы быдэ со тон мышкын вамыштэ ук. Ныраз шедьытэм кульчо борды боды юнматэмын ке но, вожомиз ке, со боды гинэ уз утьы – кульчозэ ишкалтыса, вылэ тэтчоз. Куддыр аслаз вужерезлэсь гинэ но ош кышкатске. Инмарлы тау, шудтэм учыръёс ӧй вал на. Тыбыр кышка ик. Ошез валтыку, мышке учкылыны уг яра, вожомыны быгатоз.

Пудоен, адямиен, сярысь каньылгес, шуэ предприятиысь пудо эмъясь Вячеслав Парамонов. Ошъёс татын солэсь гинэ кышкало. Эмъяськыны нокин уг яраты угось. Котьма ке но котькуд ош аслэсьтыз утялтӥсьсэ тодма, вешамез возьма. Мурт лыктэ ке, соку ик бурсыны кутске, сямзэ возьматэ. Соин ик шаерысьтымы но солэн палэназ гурт удысысь адӟытонъёсы асьсэ пудозы сьӧры утялтӥсьёссы мыно. Нош арысь аре возьматыны вань кинэ - ялан уллёзэс выльдо, кужмоято.